SÊ NOU MY HUISHULP IS MIV+?

Die MIV en vigs pandemie neem skrikwekkende afmetings aan. Die media maak ons baie bewus van die probleem en inligting op radio en in koerante oor die onderwerp is volop. Wat moet ek en jy egter met al hierdie inligting maak? Wat daarvan is waar en wat is mites? Die situasie kan nogal ingewikkeld raak - veral as ons besef so 'n dodelike siekte is ons midde. Ons dra kennis van MIV en vigs, maar ons kennis daarvan is beperk. En dan die vraag wat baie dames vra: "Sê nou my huishulp is MIV+ of het reeds vigs?"

Mense reageer verskillend hierop. Party mense wil wéét of hulle huishulp nie dalk MIV+ is nie. Die rede daarvoor is meestal omdat jy bang is dat jy of een van jou gesinslede die virus kan verkry. Veral wanneer die huishulp na jou kinders help kyk. Dan is dit éérs vir ons belangrik.
Wanneer ons huishulp siek raak of gewig verloor is ons geneig om te aanvaar dat die persoon vigs het. Daar bestaan nie meer regtig vir ons 'n ander rede waarom sy kan siek wees nie.
Wat is ons vooroordele? Is dit geregverdig? Ten einde hierdie vraag te beantwoord is dit belangrik om die feite rakende die Menslike Immuniteitsgebrek Virus (MIV) te ken.

Hoe versprei die virus? Die MI-virus word oorgedra op die volgende wyses:
* Anale, orale of vaginale seksuele omgang (hierdie infekteringswyse is vir 90% van alle MIV-infeksies verantwoordelik);
* MIV-besmette bloed wat direk na die liggaam oorgedra word (die hergebruik van spuitnaalde, die gebruik van iemand anders se skeermeslemmetjie, ens, of deur 'n bloedoortapping)
* van moeder na kind - tydens die geboorteproses of tydens borsvoeding as die ma MIV+ is.

Hoe versprei die virus nie? Die MI-virus versprei nie op die volgende wyses nie:
* Deur eetgerei te deel nie
* Deur nie-seksuele fisieke kontak
* Deur hoes of nies
* Deur dieselfde toilet of stoel te gebruik
* Muskietbyte

Mag ek my huishulp laat toets ten einde bewus te wees van haar MIV-status? Nee. U kan haar nie dwing om dit te laat doen nie. En al doen sy dit hoef sy u nie in te lig rakende haar MIV-status nie. Wat wel belangrik is, is om met jou huishulp oor MIV en vigs te praat. Sy moet weet dat jy verstaan waaroor dit gaan en dat jy nie teen haar sal diskrimineer indien sy MIV+ is nie. Mense wil nie hulle MIV-status bekend maak nie omdat hulle bang is vir diskriminering teen hulle.

Hoe kan ek dan myself en my gesin beskerm teen infektering met die MI-virus? Hanteer alle bloed en ander liggaamsvloeistowwe met handskoene. Indien dit nie beskikbaar is nie, trek ou inkopiesakke oor jou hande voor jy aan bloed vat. Verminder die risiko vir enige oordraagbare siektes tussen jy, jou gesinslede en jou huishulp wedersyds. Neem jou huishulp, minstens een keer per jaar dokter toe vir 'n deeglike mediese ondersoek. Gee aan haar 'n voedings aanvuller wat haar liggaam se immuniteit kan versterk. Gooi 'n klein bietjie Jik in skottelgoed se afspoelwater en vee werksoppervlaktes in kombuis met 'n klam lappie wat in Jik water gedoop is af om te ontsmet.

Wat kan ek doen om 'n verskil te maak rakende die MIV en vigs probleem? Ons moet besef dat ons huishulp dalk nie met MIV infekteer is nie, maar dat sy affekteer word deur die probleem. Dit beteken dat 'n gesinslid van haar dalk MIV+ is of vigs het, of dat sy na 'n kind omsien wie se ouers as gevolg van 'n vigsverwante siekte gesterf het, of dat bure of vriende van haar dalk MIV+ is of vigs het. Rus haar dus toe om die situasie te hanteer. Kry by die plaaslike kliniek of jou naaste Departement van Welsyn inligtingspamflette rakende die probleem. U kan ook inligtingspamflette bestel vanaf die Christelike Lektuurfonds (telefoonnommer 051 - 403 8503, webwerf www.clf.co.za). Hierdie pamflette is ook in Afrika tale beskikbaar.

Hoe kan ek help as my huishulp of een van haar familielede vigs het? Dit is belangrik vir mense wat MIV+ is om gesond te eet. Vars groente en vrugte is dus baie welkom. Die standaard kospakkie bestaan uit die volgende produkte: Suiker; langlewe of poeiermelk; rooibostee; Pro-Nutro; hawermout, mieliemeel; grondboontjiebotter; margarien; droë bone; ertjies; gort; lensies; sojaprodukte soos Imana en Toppers, maar nie sterk geure nie; pakkies sop; "Two-minute Noodles"; en blikkies vis. Toiletware soos toiletpapier (wat ook as sneesdoekies gebruik kan word), badseep, sjampoe, Sunlight seep, waspoeier, tandepasta (mondsorg is baie belangrik) en lyfroom is ook belangrik. Hulpmiddels vir persone wat reeds baie siek is, en tuis versorg word is die volgende: Prep; Vaseline; Aqua Room; Hande- en lyfroom; Handskoene; Gaas; "Linen savers"; Doeke vir volwassenes; Tandeborsels; Tandepasta; Waslappe; Jik; en Seep. Mense wat siek is kan ook bygestaan word deur geld te verskaf om die volgende te doen: "Ensure" aan te koop vir mense wat reeds moeilik eet; vervoer te kan bekostig na hospitale en klinieke; en die dek van begrafniskostes.

Die Christen MIV/vigs Aksiegroep (CMVA) kan opleiding voorsien rakende die MIV en vigs probleem. Die lede van die CMVA kan ook genooi word om praatjies te lewer by byvoorbeeld vrouediensbyeenkomste, selgroepbyeenkomste en kerkraadsvergaderings. U is welkom om met ds Albert Horn (018-297 7208), voorsitter van die CMVA te skakel, of met Heleen Scholtz (082 451 7684), gemeenskapswerkbestuurder van NG Welsyn. Vir meer inligting kan u die volgende webwerwe besoek: www.cabsa.co.za; www.chritians.co.za; en www. clf.co.za.
Belê in jou huishulp. Dis jou geleentheid om 'n verskil in die wêreld te maak.